CALENDARIO 2024

Aquí tedes o calendario deste ano 2024. Agora só queda recrear a vista co bonitiño que é.

CEIP ILLA VERDE E A OLERÍA

Aquí tedes unha mostra máis do ben que se traballa nos centros do colectivo Estiño. O CEIP Illa Verde investigou tamén sobre a olería. Botádelle un vistazo clicando na imaxe

 

A OLERÍA NO CEE SANTA MARÍA

No CEE Santa María de Lugo andaron traballando xa coa olería. Aquí tedes un enlace coa súa páxina onde poderedes ver as cousas bonitas que fixero. Clicade na imaxe

PRESENTACIÓN SOBRE A OLERÍA

A nosa compañeira Vanesa Bellas Fernández do CEE Santa María amósanos as cousas bonitas que se fan polos centros participantes do Colectivo.

Moitas gracias Vanesa! Un gusto gozar dos teus materiais!

Clicade na imaxe e abrirase o link ao material.

LISTADO DE PEZAS

 Aquí tedes o listado das pezas que se adxudicaron a cada un dos centros participantes este curso 2023-24

ACORDOS DA REUNIÓN DO 3 DE OUTUBRO DO 2023

Comezou o onvo curso e o Colectivo Estiño ponse de novo en marcha!

O pasado día 3 de outubro reunímonos para ir dando as primeiras pinceladas deste novo calendario.
A xuntanza foi fructífera, xa que acordamos tema e fixamos prazos para o seu desenvolvemento, alén de outras cuestións.
Pero imos ao importante:
1️⃣O tema deste ano: A OLERÍA 

2️⃣Temos todxs de prazo ata o vindeiro martes día 3 de outubro para confirmar a participación (contamos con todos vós!)

3️⃣Temos o mesmo prazo para enviar suxerencias de temas para as pezas (ou peticións se tedes especial predilección por algunha que sexa significativa para o voso alumnado).

4️⃣Mesmo prazo para enviar algunha suxerencia para o deseño do calendario (Se queredes podedes  facer un pequeno boceto da vosa suxerencia e enviar unha foto do mesmo)

5️⃣ Ese mesmo día pola tarde xuntarémonos para facer a lista definitiva de temas para facer xa o reparto, polo que o mesmo día 3 xa saberedes cal lle tocou a cada centro e poderedes ir traballándoo co voso alumnado. 

6️⃣ A semana do 9 de outubro faremos o deseño do calendário e enviarémosvos as pezas 

7️⃣ A partir de que as recibades teremos todos os centros ata o día 10 de novembro para termos enviado a nosa colaboración (lembrade que para que a poidamos ter nós ese día é necesario enviala con días de antelación).

E isto é todo! Pronto teremos máis novas

NOVO CURSO 2023-2024

CALENDARIO DO 2023

 Aquí tedes o calendario deste ano. Unha preciosura!😍

O MAR NO CEE SANTA MARÍA

Nos centros do Colectivo Estiño trabállase moito e ben e senón botádelle un ollo a C.E.E. Santa María de Lugo. Que gran traballo! Parabéns!

GLU GLU GLU NO FONDO DO MAR

 

COMO SE FIXO O CALENDARIO 2023

Para todxs xs que teñades curiosidade por saber como se fai o calendario aquí tedes un resumo da realización do deste ano.

 

 

 

INSTRUCCIÓNS

INFORMACIÓN XERAL PARA TODAS AS PEZAS

Aquí vos van algunhas instruccións para o proceso de creación:

1.  En cada unha das pezas hai escrito un número que vos servirá para facervos unha idea xeral de onde está situada a vosa peza e que será moi ben acollida polo voso alumnado porque desta forma poderán facerse unha idea global de onde irá situada.

2. Tamén atoparedes unha frecha que vos amosará o sentido no que tedes que colocar a peza para completar cos vosas/os alumnas/os. Respectade este sentido

3. Ao faceren as fotocopias non modifiquedes o tamaño. As pezas xa están escaladas

4. Non repasar o borde da peza ( rotulador ...)

5. En cambio si que deberíades repasar as pezas que van dentro con rotulador fino

6. Incluír o nome da vosa peza en maiúscula sen que toque os bordes 

7. Colorear toda a peza usando cores intensas

8. Non recortar as pezas

 

INSTRUCCIÓNS PARA AS PEZAS 1 E 2 

- Empregade tons crus clariños para o fondo

 

INSTRUCCIÓNS PARA AS PEZAS DO FARO 

- Pezas 3 e 4: Fondo en brando e non colorear a ventaniña

- Pezas 5, 6, 7, 8 e 9 : Fondo en tons marróns 

 

INSTRUCCIÓNS PARA AS PEZAS QUE FORMAN O MAR 

- Pezas do 10 ao 20: Fondo en tonos azuis

-  Pezas 14 e 17: Poñer só DE BAIXURA E DE ALTURA respectivamente ( a palabra PESCA irá entre as dúas pezas)

 

OUTRAS INSTRUCCIÓN ADICIONAIS 

- Os traballos deben ir referidos á cultura do mar en Galicia ( En Galicia non hai cocoteiros ou illas paradisíacas😉 )

- Agradecemos que fagades pequenos debuxos de 3cm X 3cm para completar os espazos baleiros do calendario

- Igualmente necesitamos refráns , adiviñas, cantigas.... relacionados co tema

- Facede unha selección de 5 debuxos cada centro. 

- Todo traballo que fagades nas vosas escolas mandádenos enlaces para incluír neste blog e na nosa páxina web.

E isto é todo!

A crear!

 

 

 

ASIGNACIÓN DE PEZAS PARA OS CENTROS

 

 Como podedes ver aquí tedes a temática que se lle asignou a cada centro para que comecemos a traballar sobre este centro de interese que tanto nos pode aportar.

Mans á obra!

 

BOSQUEXO CALENDARIO 2023

Aquí tedes o bosquexo que nuns días quedará plasmado no noso calendario. 

Como vedes dedicado ao mar!
 

NOVO CURSO 2022-23

Un ano máis aquí estamos preparadas e preparados para afrontar un novo curso cheo de alegría e sobre todo de moitos dos debuxos do noso alumnado para que quede plasmado no calendario do 2023.

Aí imos!

CÓMIC DO CEE SANTA MARÍA

CALENDARIO 2022

Aquí tedes a fermosura deste ano.💖💖💖

O CALENDARIO ESTIÑO NO CEE SANTA MARÍA

CALENDARIO ESTIÑO NO IES LEIRAS PULPEIRO

Aquí tedes unha entrada ao blog do IES Leiras Pulpeiro Clicade aquí para enlazar co seu blog

INSTRUCCIÓNS A SEGUIR

Estas son as instruccións que vos pregamos sigades para facilitar a confección do noso bonito calendario. 

Por correo ordinario (ou por outros medios) recibiredes nos vindeiros días unha peza das que compoñen o calendario deste ano. 

Nela puxémosvos a modo de recordatorio: 

a. Un número que se corresponde cunha das pezas que conforma o calendario e que podedes comprobar na imaxe que aquí vedes.

Isto é moi importante porque dávos unha idea de onde vai colocada e axuda aos nenos e nenas a facerse unha composición global do traballo. 

b. Unha frecha, que indica a dirección na que se debe colocar a peza para completala co debuxo dos alumnos/as. É de vital importancia respectar o sentido da peza para que todos os debuxos vaian ao dereito e axuda a colocar o nome no sentido correcto para a súa lectura. 

Para que o traballo quede o mellor posible recordade dar aos voso alumnado as seguintes indicacións: 

a. NON repasar o borde da peza.

 b. INCLUIR o nome con letra maiúscula SEN QUE TOQUE cos bordes da peza. (isto faise porque á hora de facer a montaxe das pezas e encaixalas, ás veces hai que facer pequenos axustes). 

c. RESPECTAR a orientación indicada pola frecha. 

d. As figuras que formen o debuxo quedan mellor se son perfiladas con rotulador fino (tipo pilot). 

e. Colorear TODA a superficie da peza, empregando tons intensos. 

f. NON recortar as pezas. 

-  Instruccións para as cores do fondo: 

-pezas do 1 ao 16: fondo grisáceo

 -pezas do 17 ao 22: fondo amarelo 

- Outras informacións importantes: 

Podedes facer pingas de auga de 1,5 x 3 cm aproximadamente na que incluir palabras normativas relacionadas co tempo. As pingas vanse poñer enchendo o espazo que queda debaixo da nube a modo de chuvia de palabras. 

Estivemos pensando que sería moi interesante elaborar un glosario de termos relacionados co tempo entre todos os centros educativos para incluir na revista Miuzallas. Xa recibiredes máis información ao respecto. 

Tamén podedes facer pequenos debuxos (de 3x3 cm aproximadamente) do que pensedes que pode quedar ben para completar a decoración do calendario como se fai todos os anos. 

Na franxa que sae entre a nube e o sol cara á esquerda vaise facer un arco da vella, e a idea é poñer ditos, refráns, cantigas, expresións relacionadas co tempo, así que podedes enviar tamén unha escolma das que teñades recollido co voso alumnado.

É imprescindible que fagades unha selección previa en cada centro, enviándonos un máximo de 5 debuxos.

É importante que recibamos máis dun porque para facer a montaxe sempre tempos en conta as pezas de arredor para combinar da mellor maneira posible

 Pedímosvos que vaides pensando un número aproximado de calendarios que ides encargar. Para nós é moi importante este dato xa que en función diso faremos o pedido á empresa encargada de imprimilos. 

Por último, avisarvos que as as pezas teñen que estar con nós o VENRES 5 DE NOVEMBRO como DATA TOPE 

Poñédevos en contacto con nós ou ben mirade no whatsapp para saber onde mandar as vosas pezas 

Moitas grazas a todas e todos polo voso esforzo. Recompensarase cando vexades o calendario rematado. Estamos seguros!

LISTADO DOS TEMAS CON SEU NÚMERO DE PEZA E TEMÁTICA

Por fin temos o reparto para os centros. Aquí o vedes

PRIMEIRA REUNIÓN DO CALENDARIO 2021-2022

O pasado día 29 de setembro tivemos a primeira reunión para poñer as primeiras directrices do novo calendario. 

Para facilitar a participación de todo aquel que quiexese tomar parte fixémola virtual. A participación foi numerosa polo que vos agradecemos esta participación activa. 

Os temas tratados foron os seguintes: 

- A temática do calendario deste ano será o tempo atmosférico 

 - Saíron varias palabras coas que deseñar o formato (chuvia, lóstrego, neve, treboada, sarabia, arco da vella, orballo, nubes, barruzo, estiño, xeada, furacán, seca, tornado, inundacións, primavera, riadas, verán, vento, outono, néboa, inverno, sol, cataventos, pluviómetro, anemómetro, barómetro,, higrómetro, aquecemento global, cataventos, tarabela, zorra, roupa...) pero ben sabedes que calquera aportación será ben recibida.

 - Deseño: os posibles deseños son paraugas, nubes, arco da vella e pingas de auga pero agardamos aquilo que se vos ocorra 

 - Na semana seguinte enviaranse as pezas a cada un dos cetros

 - Na primeira semana de novembro deberían estar os traballos rematados e entregados. Agardamos ter recibido para o venres 5 de novembro todas as pezas do calendario para comezar a montalo 

 Proximamente máis novas.

Un ano máis comeza un novo curso. Esperemos que pouco a pouco a pandemia nos vaia deixando facer unha vida máis normal e que poidamos sentirnos máis seguros e relaxados e tanto os nos alumnado coma nós poidamos gozar de novas e excitantes experiencias. Seguro que si! Para que todo continúe o máis normal posible proximamente vos daremos pistas de por onde van ir os pasos do calendario deste ano Seguídenos a pista!

REVISTA MIUZALLAS 2021

 

Un ano máis aquí tedes a nosa revista Miuzallas 2021.

 Clicade na portada e abrirase un mundo novo cheo de bonitas páxinas feitas polo alumnado dos centros colaboradores.

Moitas gracias polo seu ben facer!

 

PLANILLA PARA A REVISTA

Aquí vos deixamos o formato da planilla para facer a revista. Recordádelle aos vosos alumnos/as que o peixiño debe quedar libre para paxinar.

 Imos aló!

REUNIÓN MÉRCORES 14 DE ABRIL - REVISTA MIUZALLAS

O pasado día 14 de abril fixemos unha reunión era COVID (virtual) na que tomar decisións sobre a revista Miuzallas deste ano. Acadáronse as seguintes medidas:

 - Editarase so en formato dixital para que sexa máis accesible a calquera persoa que estea interesado/a nela 

-As colaboracións de cada centro basearanse no tema que lle foi asignado para o calendario. Aínda así pódese ampliar a outras temáticas pero sempre dentro do campo semántico do río

 -Podedes enviar pasatempos, debuxos, poemas.... 

- Se tedes traballos multimedia podedes enviar o enlace para incluílos tanto neste blog coma na páxina web e así darle máis visibilidade.

 - A data máxima de entrega é a primeira semana de maio para que así poidamos tela lista para as Letras Galegas 

 Agardamos as vosas fermosas aportacións! 

Devecemos por velas!

CALENDARIO DO 2021

 

Aquí tedes finalmente o calendario deste ano. 

Ben bonitiño que quedou! 

Un calendario que esperamos sexa imaxe deste novo ano que vai comezar, cheo de vida e natureza viva.

Esperamos que vos guste!

 

COMO SE FIXO O CALENDARIO DO 2021

O NOSO CALENDARIO NO IES LEIRAS PULPEIRO

O blog de normalización do IES Leiras Pulpeiro recolle a súa participación na creación do calendario de Estiño.Clicade na imaxe se queredes ver como o fixeron

BOCETO DO CALENDARIO 2021

 Aquí tedes o boceto que seguiremos para a creación do noso marabilloso calendario. Agardamos que vos guste.

INSTRUCCIÓNS CALENDARIO 2020

REPARTO DE VIÑETAS PARA OS CENTROS PARTICIPANTES

Por fin temos elaborada a relación de centros participantes nesta edición e o reparto de temas para cada centro.

Se algún cole prefire traballar outro animal ou planta diferente que NON estea no listado, avisade por favor.

O deseño das pezas nas que facer os debuxos terémolos listos nos vindeiros días.

A poñer as cabeciñas a pensar!

A TEMÁTICA DO CALENDARIO DO 2021

Nunha reunión informal, e en "petit comité" dadas as circunstancias, xurdiu a idea dos ríos e os seus ecosistemas como idea central do calendario deste ano. Que vos parece?

NOVAS INCORPORACIÓNS PARA O CURSO 2020-2021

Gustaríanos dar a benvida aos compañeiros e compañeiras que se suman este ano ao noso colectivo: o CEIP San Xoán de Becerreá e o CEIP Gregorio Sanz de Ribadeo.

BENVIDOS!

EN ESPERA!

Neste ano tan atípico fixemos o noso calendario con toda a ilusión pero quedaron moitas cousas non tinteiro como por exemplo a nosa revista Miuzallas.

Os centros educativos quedaron baleiros e os nosos nenos e nenas non puideron amosarnos todo o que traballaran durante o ano coa temática das froitas.

Pero di o dito que ao mal tempo boa cara e iso é o que imos facer. Xa andamos argallando algo para o vindeiro curso.

 

NOVO CURSO 2020-2021

Chegou o novo curso! Un curso chego de incertidumes, dúbidas e medos pero nós non imos amedrentarnos. 

Imos seguir enchendo o mundo coas ideas saídas das cabeciñas dos verdadeiros artífices do calendario Estiño: os nenos e nenas da Galicia de hoxe.

Estade atentos qiue pronto haberá novas

 
 

CALENDARIO 2020

Estiño no IES Leiras Pulpeiro

Aquí recollemos a participación do IES Leiras Pulpeiro na elaboración do calendario do 2020. (Clicade na imaxe)
Bravo por eles!

VIDEO DO MAKING OFF DO CALENDARIO 2020

PRODUTO FINAL 2020

O venres por fin saiu á luz o calendario deste ano 2020.

Que bonitiño é! Que colorido!

 Agardamos que vos guste e que gocedes moito del

 A falta dos últimos retoques quedade á espera do produto final

Saúdos estiñeiros

BOCETO DO CALENDARIO

Para que poidades ir facéndovos unha idea aquí vos deixamos o debuxo inicial para este ano. A colorealo coas vosas creaccións!

REPARTO DE FROITAS

Un ano máis aquí estamos ultimando o calendario deste vindeiro 2020.
Este dedicarémolo ás froitas coloridas e saborosas. Aquí vos deixamos o reparto por escola e froita.

CALENDARIO 2020

Un ano maís aquí estamos dispostos a darlle de novo alegría aos calendarios das nosas casas

 Despois de varias xuntanzas e debate por fin temos a temática: AS FROITAS

 Proximamente teredes máis novas.

 Saúdos estiñeiros

MIUZALLAS EN FORMATO REVISTA

REVISTA MIUZALLAS 2019

Revista Miuzallas 2019 from ropergo

Aquí tedes a revista deste ano dedicada ás flores Gozade dela que é moi bonitiña!

DIRECCIÓNS INTERESANTES

 

Se estades interesados/as no tema deste ano do calendario temos algunha que outra suxerencia:

- No Instagram no perfil FLORADEGALICIA  que ten unha galería cunha gran cantidade de fotos

- No blog https://floradegalicia.wordpress.com/

E se queredes compartir a vosa sabiduría convidámosvos a participar no grupo de Facebook
Palabras de noso do CPI Plurilingüe de Navia de Suarna onde recibirán encantados/as as vosas aportacións

CALENDARIO 2019

Por fin xa temos o resultado final!

 O noso ben prezado calendario saíu á luz así que agora o que queda é mercalo para adornar os vosos fogares ou mesmo para facer un bonito agasallo de inicio de ano.

Os puntos de venta son:
- Libraría Trama
- Agrupación cultural A Volta do Agro
- C.I.G
- Facultade de Formación do Profesorado
- A Cova do Raposo
- Bico de Grao

MAKING OFF DO CALENDARIO 2019

ASÍ SE RECOLLE O CALENDARIO NO IES LEIRAS PULPEIRO

O pasado sábado 10 de novembro recolleuse o calendario Estiño no blog do EDL do IES Leiras Pulpeiro. Aquí tedes o enlace por se tedes curiosidade

http://e-un-falar.blogspot.com/2018/11/arrincamos-co-calendario-estino-2019.html?m=0

BOCETO DO DEBUXO

Ola outra vez!

Achégase o momento de montar o calendario 2018-2019 e vós sen saber cal vai ser o debuxo!

Pois aquí vos deixamos un adianto de como vai ser a forma que tome o noso calendario este ano.

Agardamos con interese e entusiasmo as vosas obras de arte.

LISTADO DO TEMA E NÚMERO DE PEZA ASIGNADO

Por fin temos o reparto de pezas e a súa temática. Aquí vos deixamos o listado

CALENDARIO 2019

Este ano imos celebrar o 40 calendario de Estiño e queríamos que fora ben bonito, por iso na reunión celebrada onte decidimos que que mellor que dedicar a temática ás flores.

Fíxose un boceto de como poderá ser o debuxo final pero temos que darlle algunha voltiña máis. O que si temos finalizado é a distribución de flores por centro. 

No futuro próximo enviarémosvos xunto coa peza que vos corresponda as instruccións axeitadas para que non teñades ningún problema.

Ademais agradecémosvos que nos informedes do número aproximado de nenos e nenas que participarán dalgún xeito deste proxecto nos vosos centros

Enchamos o mundo de flores!

VOLTA AO COLE

 Chegou o inicio de curso e con el as nosas ganas de voltar a preparar o almanaque do novo ano.
Desexámosvos un novo comezo de curso cheo de alegría e ilusión.
Imos aló!

REVISTA MIUZALLAS 2018

Miuzallas 2018 from ropergo

 Aquí vos deixamosa versión dixital da revista Miuzallas 2018 dedicada á auga. Agardamos que vos guste. 
 

PRONTO SAIRÁ A MIUZALLAS 2018

Despois de paxinar e distribuír os vosos traballos, hoxe saiu a revista Miuzallas cara a impresión. Agardamos ter pronto a versión en papel pero tamén a dixital para que todos poidamos gozar dela dende calquera parte do mundo.
Estamos agardándoa!

LUME!

Co gallo do 8 de marzo amosámosvos un bonito poema que escribiu Antía Piñeiro, alumna do IES de Allariz. Toda unha declaración de intencións

8 DE MARZO. DÍA INTERNACIONAL DA MULLER

O NOSO APOIO A ADELA FIGUEROA

Como é ben sabido, o pasado 27 de Febreiro viviuse un desafortunado acontecemento nas instalacións da Xunta de Galicia en Lugo

 Unha usuaria do Servizo de Deportes solicitou ser atendida en galego. A funcionaria en cuestión non só fallou nas súas responsabilidades senón que foi pouco profesional no seu facer.

O colectivo Estiño, firme defensor da lingua galega, quere apoiar a esa usuaria.

 O seu nome é Adela Figueroa.

Se queredes seguir o seu relato clicade aquí

Dende aquí todo o noso agarimo e forza, Adela.

CALENDARIO 2018

Aquí tedes o noso calendario 2018.
 Ben bonito nos quedou!

REUNIÓN MARTES 21 DE NOVEMBRO- CREACIÓN DO CALENDARIO 2018

O día 21 de novembro reunímonos de novo para facer o calendario 2018.
Aquí vos deixamos algunhas das imaxes do momento para que poidades gozar con elas.

REVISTA MIUZALLAS

Bo día a todas e todos!

Como ben sabedes o colectivo Estiño ademais de crear o tan fermoso calendario pretende tamén recoller todo ese traballo arduo e laborioso que facedes nos centros nunha revista que dea visibilidade ao que estades a facer. Ese é o obxecto de Miuzallas: poñer en común as diferentes iniciativas que levades a cabo cada un de vós.

Analizando as dinámicas de anos anteriores chegamos á conclusión de que quizais sería interesante comezar a recoller todas esas cousas bonitas que facedes xa dende o momento en que se empeza a elaborar o calendario. Por experiencia sabemos que ese é o momento en que máis se traballa o tema. Así que para aqueles que xa queirades ir recollendo as vosas actividades mandámosvos xa a plantilla da revista.

Como poderedes ver está en formato PDF. Algúns de vós comentástesnos o ano pasado que vos gustaría ter unha plantilla na que puidérades escribir non só a man senón tamén a ordenador. Utilizando o programa Adobe Acrobat Pro podedes insertar o texto que queirades ( Barra superior, icono dunha folla cun boli -> firmar, agregar texto).

Recordade que non podedes debuxar nin escribir no debuxiño da nube que hai na parte inferior.

Máis adiante daremos prazo de entrega para que nos mandedes esas cousas bonitas que sabedes facer.

Que vos flúan as boas ideas e os bos sentimentos coma fontes sen fin.

PARA DESCARGAR PLANTILLA REVISTA MIUZALLAS 2017-2018 CLICA AQUÍ

REPARTO DAS VIÑETAS CALENDARIO 2017-2018

Benqueridos compañeiros e compañeiras!

Por fin temos xa a versión definitiva do debuxo coa súa distribución para cada un dos centros!

No documento adxunto atoparedes unha táboa onde está o nome do voso cole, a temática que vos corresponde e o número de viñeta que vos foi asignado.

Aínda que xa todos coñecedes como é o funcionamento recordade:

- Non empregar azul como fondo da viñeta. No calendario deste ano é inevitable usar o azul pero temos que tentar utilizalo o menos posible.

- A maiores da vosa viñeta podedes enviarnos debuxiños dun tamaño aproximado de 2 x 2 cm. para completar o calendario.

- Tamén necesitamos ditos, adiviñas, refráns.... para colocar en pequenos espazos que queden libres.

- Non modifiquedes o tamaño das viñetas que vos foron enviadas.

- Recordade escribir con letra ben clariña cal é o nome da vosa parcela de calendario.
- COLOREAR INTENSAMENTE
- RESPECTAR AS BEIRAS.
- PREFERIBLEMENTE EMPREGAR LETRAS MAIÚSCULAS PARA POÑER O NOME DE CADA UNHA DAS VIÑETAS E NON PEGAR DE TODO AS LETRAS ÁS BEIRAS (por se temos que recortar algunha peza para axustar ben o deseño).
- OS DEBUXOS XERALMENTE QUEDAN MELLOR SE VAN REPASADOS CON PILOT NEGRO.
- No deseño vaise incluir un globo de texto no que estamos a pensar poñer algún texto relacionado co tema- Se sabedes dalgún que poida encaixar... compartídeo!!!!
 - Como en anos anteriores tamén se poden facer DEBUXOS PEQUERRECHIÑOS que non superen os 2x2 cm relacionados co tema para completar o calendario.
- A DATA TOPE PARA A ENTREGA DOS DEBUXOS É O MARTES 15 DE NOVEMBRO. Aínda queda moito por facer (montaxe, impresión, reparto...) así que respectar os prazos facilitará que chegue o Nadal e xa o teñamos listo.

MOI IMPORTANTE- Prazo de entrega: os vosos debuxos deberían estar con nós antes do 15 de novembro. Temos idea de montar o calendario o venres 17 polo que vos pregamos encarecidamente que nolos fagades chegar como máximo ese día 15.

E despois de recordarvos todas estas cousiñas, darvos as grazas pola implicación neste bonito proxecto que entre todos facemos que sexa coñecido alén dos sete mares.

REUNIÓN DO 21 DE SETEMBRO

Despois dun parón provocado por uns problemiñas técnicos e a modorra do San Froilán voltamos outra vez á carga dispostos a preparar o calendario máis bonitiño xamais visto. ( ou polo menos para este vindeiro ano)
Na última reunión do día 21 de setembro decidimos tomar como temática A AUGA.

O "departamento de deseño e artes plásticas" están a finalizar co debuxo que finalmente nos dará o soporte para cada unha das nosas viñetas.

 Mentres non temos ese preciado deseño final propoñémosvos cal é o tema que se vos asignou para que vaiades traballando sobre el:
- CEIP Rábade: A chuvia
- CEIP Albeiros: O ciclo da auga
- CPI Cervantes: A neve
- CPI Navia de Suarna: O río
- CEIP Sagrado Corazón: A auga como bebida.
- CEP Santa María: Os lavadoiros
- CEIP Cruceiro Vilalonga: O mar
- CEIP A Ponte: As termas
- IES Leiras Pulpeiro: Datos científicos ( fórmula, distribución en porcentaxes no mundo, no corpo humano...)
- IES Meira: A potabilidade
- CEIP Celso Currás: As fontes
- CEIP Mosteiro: A pesca
- CEIP Xoán de Requeixo: Os encoros
- CEIP Muimenta: Os muíños
- CEIP Monseivane: As lagoas
- CEIP As Nogais: As fervenzas
- CEIP Poboa de Brollón: Os pozos
- CEIP Eloísa Ribadulla: A seca, a escaseza
- CEIP Allariz: A contaminación
- EEI Sarria: A roupa de auga
- CEIP Xosé Luis Taboada: Os estados da auga
- CEIP Quiroga Ballesteros: A sarabia
- CEIP Illa Verde: A hixiene

Agardamos enviarvos os vosos modelos respectivos o antes posible.

Que teñades un feliz comezo de outono libre de desgrazas coma estes últimos lumes.

Saúdos estiñeiros.

REUNIÓN 18 DE SETEMBRO

Ola compañeiros e compañeiras!

Como sabedes o pasado luns día 18 xuntámonos de novo para decidiren cal ía ser o tema do calendario do vindeiro curso e xurdiron dúas cuestións:

1. Continúan todos os centros que participaban o ano pasado? Incorpórase algún máis?

Para solventar esta dúbida pregámosvos que en caso de non seguir ou ben se a persoa / e-mail de contacto cambiou nolo digades o antes posible.

2. Despois de moitas deliberacións e tendo en conta as vosas aportacións escollemos o tema de A AUGA. Pero o traballo non remata aí. Agora temos que pensar como podería ser o deseño da silueta e tamén a que se podería dedicar cada unha das viñetas, polo que necesitamos da vosa axuda novamente. Mandádenos ideas, debuxos, temas...na forma que mellor creades (explicándonolo, escaneando o debuxo...) Agardamos as vosas suxerencias coma auga de maio ( dito moi acaído para o tema en cuestión)

E agora que a maquinaria xa comezou a funcionar non a deixemos parar.  Volvemos a reunirnos o luns próximo, día 25 de setembro, na rúa Dinán 9 2º A onde vos esperamos.

NOVO INICIO DE CURSO 2017-2018

Ola compañeiras e compañeiros!

O pasado luns comezamos de novo a nosa andaina cunha reunión coa que pretendemos poñérmonos de novo en funcionamento. E que mellor que empezar pensando en cal podería ser a temática do próximo calendario!

Algúns dos temas que saíron foron os lugares máxicos, o cocho, a auga... pero é probable que moitos de vós teñades unhas ideas maravillosas que nos darán moitas máis opcións. Polo tanto, estamos á espera de que nos fagades chegar calquera suxerencia que teñades.

O vindeiro luns repetiremos a reunión no mesmo sitio ( Rúa Dinán 9 2A) e á mesma hora (4:30) para escoller un deses temas e comezar a "argallar" no calendario do ano que ven.

Agardamos as vosas ideas.

Desexámosvos un bo comezo de curso e felicitámosvos por seguir sendo parte de Estiño.

A VOLTA AO COLE. CURSO 2017-2018

Despois dun verán reparador xa estamos aquí de novo. Comezamos este novo curso cun pulo que nos levará a traballar máis e mellor.
E que mellor que empezar a ano oca primeira reunión!
Hoxe xuntarémonos ás 4.30 para dar as primeiras pinceladas do calendario do vindeiro ano.
Convidámosvos á reunión para que aportedes as vosas ideas.
Agardámosvos.